روزنامه هیواد

جمهور رییس د ټاکنو د امنیت د تامین لپاره پر جدی تدابیرو او په ځانګړو عملیاتو کې پر لازم دقت ټینګار وکړ

د افغانستان د اسلامی جمهوریت د  جمهوررییس محمد اشرف غنی په مشرۍ د وسله وال پوځ  اعلی سرقومندانۍ غونډه چې په کې د هېواد د امنیتی او دفاعی بنسټونو مسؤولینو او د ټاکنو خپلواک کمېسیون او د شکایتونو کمېسیون رییسانو هم حضور درلود، جوړه شوه.

په دې غونډه کې چې پرون سهار په ارګ کې ترسره شوه، لومړی امنیتی او دفاعی مسوولینو د رای ورکولو مرکزونو،محلونو، د ټاکنیزو دفترونو د کارکوونکو او رایه ورکوونکو د امنیت د ټینګښت لپاره د جمهوری ریاست د ټاکنو امنیتی پلان وړاندې کړ.

جمهوررییس غنی د یاد پلان تر اورېدو وروسته وویل، د هېواد امنیتی او دفاعی بنسټونه دې په ګډه همکارۍ او لا زیاتې همغږۍ د جمهوری ریاست د ټاکنو بهیر د امنیت ټینګښت لپاره جدی تدابیر ونیسی.

جمهوررییس د ټاکنیزو  څارونکو، رسنیو، مدنی ټولنو او د ټاکنو اړوند نورو بنسټونو د امنیت پر تامین ټینګار وکړ او زیاته یې کړه: د جمهوری ریاست د کاندیدانو او انتخاباتی ټیمونو امنیتی غوښتنو ته دې پر وخت رسېدنه وشی.

د هېواد جمهوررییس د امنیتی ګواښونو زیاتېدا ته په اشارې وویل، د هېواد امنیتی او دفاعی بنسټونه دې د خپلو امنیتی پلانونو جوړولو او د برنامو په عملی کولو کې زیات انعطاف په پام ولری.

د وسله وال پوځ د اعلی سرقومندانۍ غونډې په دویمه برخه کې، د هېواد د امنیتی او دفاعی بنسټونو مسوولینو د ملکی تلفاتو دمخینوی لپاره د خپلو اقداماتو او تدابیرو راپورونه غونډې ته وړاندې کړل.

هغوی وویل، د هېواد امنیتی او دفاعی ځواکونو د ځانګړو عملیاتو پر مهال طالبانو ته درانه تلفات اړولی دی.

یادو مسوولینو څرګنده کړه، په هر امنیتی رویداد کې چې ملکی وګړو ته زیان رسېدلی وی، د هېواد امنیتی او دفاعی ارګانونه یې په هر اړخیزه توګه ارزوی.

جمهوررییس او د وسله وال پوځ اعلی سرقوماندان د یاد راپور تر اورېدو وروسته امنیتی او دفاعی مسوولینو ته په خطاب کې وویل، چې د عملیاتو پر مهال ډېر محتاطانه عمل او لازم دقت وکړی، ترڅو ملکی وګړو ته زیان ونه رسېږی.

ممکن است شما دوست داشته باشید