روزنامه هیواد

ارګ : امریکا د ځواکونو دکمولو تصمیم شرایطو ته په کتو  نیسی

ولسمشرۍ ماڼۍ وایی: د امریکا د بهرنیو چارو وزیر ډاډ ورکړی، چې د امریکا په ستراتیژۍ کې تغییر نه دی راغلی او د سرتېرو کمول به د افغانستان شرایطو ته په کتو تر سره شی. د ولسمشرۍ ماڼۍ ویاند صدیق صدیقی پرون پر خپله ټوېټر پاڼه لیکلی ، چې د امریکا د بهرنیو چارو وزیر مایک پمپیو دغه ډاډ ولسمشر محمد اشرف غنی ته په وروستیو تلېفونی خبرو کې ورکړی دی.مایک پمپیو تېره اوونۍ د افغانستان په اړه د ټرمپ د وروستیو څرګندونو په اړه له ولسمشر محمد اشرف غنی سره تلېفونی خبرې وکړې.د افغان حکومت ویاند صدیق صدیقی پر داسې مهال دغه څرګندونې کوی، چې د امریکا د بهرنیو چارو وزیر مایک پمپیو وړمه ورځ ویلی، چې ولسمشر ټرمپ غواړی د امریکا د ۲۰۲۰ م کال تر ولسمشریزو ټاکنو مخکې له افغانستان څخه د خپلو سرتېرو د ویستلو لړۍ پیل کړی.ولسمشر ټرمپ د تېرو ټاکنو په کمپاینونو کې ویلی وو،  چې له افغانستان څخه به خپل ځواکونه وباسی او په دغه هېواد کې به خپلې تر ټولو اوږدې جګړې ته د پای ټکی کېږدی، خو واک ته له رسېدو وروسته یې افغانستان ته نور ځواکونه را واستول او د خپلو قوماندانانو واکونه یې
هم زیات کړل.په افغانستان کې د امریکایی سرتېرو د کمولو راپورونه یو ځل بیا پر داسې مهال راپورته کېږی، چې ټاکل شوې روانه میاشت په دوحه کې د امریکایی او طالب استازو اتم پړاو خبرې پیل شی.د دغو خبرو یو مهم اړخ هم له افغانستان څخه د بهرنیو ځواکونو پر وتلو د دواړو لورو موافقه ده    چې تر اوسه وروستۍ شوې نه ده.په افغانستان کې دا مهال شاوخوا ۱۴۰۰۰ امریکایی عسکر مېشت دی، چې د ماموریت عمده برخه یې د افغان ځواکونو روزل او تجهیزول دی.په افغانستان کې په تېرو څه باندې ۱۵ کلونو کې شاوخوا ۲۴۰۰ امریکایی سرتېری وژل شوی او زرګونه نور ژوبل شوی دی.

ممکن است شما دوست داشته باشید