ولسمشر غنی: د ملګرو ملتونو امنیت شورا دې پر طالبانو بندیزونه پلی کړی

د ملګرو ملتونو د امنیت شورا په ځانګړې غونډه کې د بحث اصلی ویناوالو د سولې او ثبات د راتلو لپاره د هڅو په چټکۍ ټینګار وکړ.
غونډه په دې عنوان جوړه شوې وه چې امنیت شورا په افغانستان کې د سولې له پروسې د ملاتړ لپاره څه کولی شی؟
د افغانستان جمهور رئیس محمد اشرف غنی د امنیت شورا په غونډه کې د ګڼو نورو ګډونوالو په څېر د ویډیو کنفرانس له لارې براخه اخېستې وه او په خپله وینا کې یې د سولې لپاره د افغان دولت له هڅو او د ده په خبره قربانیو یادوونه وکړه.
ولسمشر غنی طالبان تورن کړل چې له سږ فبروری راهیسې یې د نرمښت پرځای له تشدده کار اخېستی او ګڼو افغانانو ته یې مرګ ژوبله اړولې ده.
ولسمشر غنی د ملګرو ملتونو له امنیت شورا څو غوښتنې وکړې چې یوه او مهمه یې د سولې د خبرو د بریا لپاره پر طالبانو د بندیزونو پلی کول و.
دی وایی: “زه له شورا څخه غوښتنه کوم چې له طالبانو سره د خبرو اترو د بریا لپاره د کلیدی وسیلې په توګه د بندیزونو په پوره او اغېزمن پلی کولو باندې ټینګار وکړی. طالبانو تر دې دمه ټاکلی شرایط نه دی پوره کړی. بندیزونه یوازې هغه وخت مؤثریت لرلی شی چې د ټولو له خوا پلی شی او په اوسنی مېکانېزم کې په هر ډول بدلون باندې غور باید یوازې د سولې په پروسې او د هغې په پایلو کې د پام وړ پرمختګ د راتلو په صورت کې وشی چې موږ لا تر اوسه نه دی لیدلی او همدا راز یوه داسې افغانستان ته د طالبانو تعهد چې په هغه کې د ښځو اساسی حقونه خوندی وی او لږه کی بیا له تبعیض سره مخ نه شی.”
د راپورونو پر اساس د افغانستان د سولې د هڅو په پیل سره د طالبانو په ځینو مشرانو باندې د ملګرو ملتونو لګیدلی بندیزونه نرم شوی او د دغه نرمښت یوه پایله او بېلګه بېلابېلو هېوادونو ته د طالب مشرانو ازادانه تګ راتګ دی.
د افغانستان په اړه د ملګرو ملتونو د امنیت شورا دې ځانګړې غونډه کې ولسمشر غنی د قطر په کوربه توب د افغان دولت او طالبانو د مرکچیانو خبرې ښې وبللې، خو نیوکه یې وکړه چې د اوربند د ټینګښت هیله یې نه ده پوره کړې.
د امنیت شورا دې غونډې ته د قطر مرستیال صدراعظم او بهرنیو چارو وزیر شیخ محمد بن عبدالرحمان آل ثانی وویل چې هېواد یې د افغانانو کوربه توب کوی او د افغانانو د سولې او ثبات د ټینګښت د هیلې په پوره کولو کې هېڅ هڅه نه سپموی.
د غونډې بله ویناواله د افغانستان لپاره د ملګرو ملتونو د سرمنشی ځانګړې استازې او د یوناما مشره دیبورا لاینز وه.
د اغلی لاینز د وینا یوه مهمه برخه د قطر په خبرو څرخېده: “موږ همدا اوونۍ واورېدل چې امکان لری دواړه ډلې په طرزالعمل باندې موافقې ته نږدې وی چې په مټ به یې د اجنډا په اړه بحث ته لار هواره شی. دا به یو ډېر لوی پرمختګ وی. د دغه نوی باب په پرانېستلو سره باید نړیواله ټولنه وګوری چې څنګه دا هڅې پیاوړې کولای شو څو سوله د یوې واقعی بریا چانس ولری.”
اغلې لاینز وویل، که څه هم په افغانستان کې تاوتریخوالی لوړ دی خو مهمه او مثبته خبره دا ده چې په دې کړکیچن حالت کې د افغانستان د دولت او طالبانو پلاوی خبرې کوی.
د افغان دولت او طالبانو تر منځ د سېپټمبر په ۱۲مه په دوحه کې خبرې پیل شوی.
له څه باندې دوو میاشتو خبرو ایله اوس د ځینو پرمختګونو راپورونه خپریږی.
د فرانسې خبری اژانس په پاکستان او دوحه کې د درېیو طالب چارواکو په حواله چې نه غواړی نومونه یې افشا شی، خو د دوحې د خبرو په جزئیاتو خبر دی راپور ورکړی چې موافقه ډېره نږدې ده او ښایی په څو ورځو کې ګډه اعلامیه خپره شی چې ورپسې به رسمی خبرې پیلیږی.
د فرانسې خبری اژانس په دوحه کې د افغان دولت د یوه چارواکی په حواله هم ویلی چې دواړو ټیمونو اختلافی مسایل سره هوار کړی.