روزنامه اصلاح

وزارت معارف زمان رخصتی‌ زمستانی مکتب‌ها را اعلام کرد

وزارت معارف اعلام کرده است که همۀ مکتب‌های دولتی، خصوصی و مدرسه‌های دینی در مناطق سردسیر کشور از نیمۀ ماه قوس به صورت کامل رخصت می‌شوند.
این وزارت دیروز یک‌شنبه (۲۵ عقرب) با نشر خبرنامه‌یی می‌گوید که صنف‌های اول تا ششم مکتب‌ها در مناطق سردسیر از اول ماه قوس و صنف‌های هفت تا دوازده از پانزدهم ماه قوس سال جاری رخصت می‌شوند.
خبرنامۀ وزارت معارف می‌افزاید که در مناطق «بسیار سرد» کشور همۀ صنف‌های مکتب‌های دولتی و خصوصی به شمول مدرسه‌های دینی از اول ماه قوس رخصت خواهند شد.
بر اساس این خبرنامه، آزمون نهایی مکتب‌ها در اول سال آموزشی ۱۴۰۰ گرفته خواهد شد. در این خبرنامه همچنان آمده است که معلمان مکلف‌اند از درس‌های خوانده‌شده در جریان سال جاری پرسش‌های آزمون نهایی امسال را آماده بسازند.
گفتنی است که سال آموزشی بنابر همه‌گیری ویروس کرونا در کشور با پنج ماه تأخیر آغاز شد. درس‌های حضوری امسال در مکتب‌های دولتی در اول سنبله امسال آغاز شد.

ممکن است شما دوست داشته باشید