روزنامه اصلاح

غازی سیال د ګلناربېګم له استادۍ تـر ناول لیکنې

غازی سیال چې له نورو ژبو سره د پښتو ادب د سیالولو په سیالۍ کې نژدې نېمه پېړۍ کار وکړ د سه شنبې په ورځ وفات شو او پرون د پښتونخوا په بنو کې خاورو ته وسپارل شو.

د غازی سیال خپله خبره ده چې پر ۱۹۳۳ کال یوه علمی او ادبی کورنۍ کې زېږېدلی او خپلې زدکړې یې له پنج ګنج او ګلستان سره له خپل پلار عبدالغفور شاه پیل کړې او تر صرف او نحوې یې دا زدکړې په کور کړې وې.

نوموړی د شعر او داستان برخه کې تر ۱۶ کتابونه چاپ کړی او ځینې ناچاپ اثار هم لری.

په چاپ شویو کتابونو کې پنځه شپږ نثر او درې کتابونه یې نعتونه دی، تر شپږو د نظم کتابونه او درې ناولونه لری.

نوموړی د څه باندې ۵۰ پښتو فلمونو لپاره سندرې هم لیکلې دی چې د ګلناربېګم په څېر د وخت وتلې سندرغاړې ویلې دی.

“زما سندرې ستا لپاره ” یې داسې کتاب دی چې فلمونو ته کښلې سندرې یې پکې چاپ شوې دی او درې ایوارډونو یې پرې ګټلی دی.

هغه پر ګناربېګم هم وروستیو کې کتاب لیکلی چې د سندرې روح نومېږی.

استاد اصف صمیم وایی، د موسیقۍ د کمپوزونو استاد شاعر و او لویه شتمنی یې دا ده چې خپله غازی سیال د دې سبب شو چې ګلناربېګم یې راډیو ته راوسته او هنری روزنه کې یې ډېر لاس و.

نوموړی وایی غازی سیال د هغې د روزنې په هکله وخت ناوخت خبرې او لیکنې کړې دی.

د استاد صمیم په خبره، غازی سیال د پښتو ولسی سندرو پر ژوندی کولو ډېر کار کړی او دې برخه کې یې د سندرې روح په نوم کتاب لیکلی دی.

ښاغلی صمیم وایی، په دې برخه کې د ګلناربېګم استاد و، د دې استادۍ ویاړ لری او کله چې رشید علی دهقان پېښور راډیو مشر و د سیال سره یې ملګرتیا وه او ګلناربېګم یې وهڅوله چې راډیو ته لاړه شی.

ګلنار بېګم راډیو ته لاړه، خو وروسته یې فلمونو کې هم سندرې وویلې، مګر راډیو کې یې “نری باران دی پاس په ځوړ یې وروینه ” یا “د غرو لمنو کې شپونکیه شپېلۍ غږوه ” اوس هم مینوال لری.

دا هغه سندره ده چې غازی سیال ورته کمپوز کړه او دا ډول نورې سندرې یې هم فلمونو او ډرامو ته ویلی او د نوموړی په مټ دا ولسی سندرې نن هم ژوندۍ دی.

خو د مینې او عشق پر سندرو سربېره یې د پښتنو، درد او بد حالت هم ژړولی دی او دا سندره یې وخت ناوخت له موضوع سره یادېږی چې وایی:

د چا خوښېږی نه چې کومه جوړه واغوندمه

څوک په کفن پورې حیرانه په تختو پراته وی

یا وایی:

 

څوک پښتو وخوړل سیاله

څوک لګیا دی چې پښتو خوری

خواله رسنیو کې د غازی سیال پر مړینه خواشینی ښودل شوې او د پښتو لپاره یې لوی زیان بللی، خو خپله غازی سیال وایی:

مرګ مې هم نشی وژلی

زه فنکار یم نه مړ کېږم

د خپل فن په زور به سیاله

یو ځل بیا را ژوندی کېږم

غزا نور  /  بی بی سی

ممکن است شما دوست داشته باشید