روزنامه اصلاح

زندانی افغان از زندان‌های تاجیکستان به افغانستان انتقال داده می‌شوند

صلاح الدین ربانی وزیر امور خارجۀ کشور با امام علی رحمان رییس جمهوری تاجیکستان دیدار کرد.

 در خبرنامۀ وزارت امور خارجه آمده است که در این دیدار، وزیر امور خارجۀ کشور با سپاسگزاری از حمایت و کمک های دولت و مردم تاجیکستان، این کشور را دوست و برادر افغانستان خواند و خواهان انتقال هشتاد تن از زندانیان افغان به افغانستان شد.

 بر اساس خبرنامۀ وزارت امور خارجۀ کشور، رییس جمهور تاجیکستان اطمینان داده است که هشتاد تن از زندانیان افغان به زودی به افغانستان انتقال داده خواهد شد. وی همچنان افزود که بند راغون در یک سال آینده تکمیل و برای افغانستان برق خواهد داد.

بر اساس یک خبر دیگر، صلاح الدین ربانی وزیر امور خارجۀ کشور با شکور جان ظهوراوف رییس پارلمان تاجکستان، ملاقات کرده است.   ظهوراوف گفته است که تاجیکستان آمادۀ گسترش روابط خود با کشورهای منطقه به ویژه جمهوری اسلامی افغانستان است. وی علاوه کرده که امنیت افغانستان نه تنها به امنیت تاجیکستان، بلکه به تمامی کشور های آسیای میانه تاثیر گزار بوده و از آماده گی  کشورش در استقرار صلح و ثبات و مبارزه با تروریزم، قاچاق مواد مخدر و جنایات سازمان یافته اطمینان داده است. وی صلح و ثبات در تاجیکستان را از زحمات شهید استاد برهان الدین ربانی، شهید صلح و احمد شاه مسعود قهرمان ملی افغانستان خوانده افزود که حکومت و ملت تاجیکستان احسان مند آنها می باشد.

وی همچنان پروژه های منطقه‌ای را برای رشد و ثبات در افغانستان مهم خوانده و افزود: تاجیکستان آماده است که از طریق پروژه کاسا ۱۰۰۰ و انتقال برق با این کشور همکاری نماید.

ممکن است شما دوست داشته باشید