روزنامه اصلاح

د کمال خان بند اوبه زرنج ښار ته ورسېدلې

د افغانستان د اوبو د چارو د تنظیم ملی اداره وایی چې د کمال خان بند کې ذخیره شوې اوبه د لومړی ځل لپاره زرنج ښار ته رارسېدلی دی.
د نیمروز مرکز زرنج ښار د کمال خان بند نه شااوخوا ۹۰ کیلو متره لیرې پروت دی او دغه اوبه د لشکری کانال له لارې دغه ښار ته رسېدلې دی.
د اوبو د چارو د تنظیم ملی ادارې ویاند نظام خپلواک په دې اړه وویل: “زرنج ته رارسېدلې اوبه به د دغه ښار زراعتی ځمکې خړوبې کړی.”
د افغانستان ولسمشر د نوی کال په څلورمه د کمال خان بند پرانیسته.
پرانیست غونډې کې محمد اشرف غنی وویل چې له دې وروسته به بل هیواد ته وړیا اوبه ورنکړی.
هغه زیاته کړه که ایران وغواړی د دواړو دولتونو د هوکړې له کچې ډېرې اوبه ترلاسه کړی په عوض کې دې افغانستان ته تېل ورکړی.
د چارواکو په وینا دغه بند ۱۸۴ زره هکټاره ځمکه خړوبوی، لږ تر لږه ۹ میګاواټه برېښنا تولیدی او د ۵۲ میلیون متر مکعبه اوبو د زېرمه کولو وړتیا لری.
د افغانستان په شان وچې کې ایسار هیواد ته چې ډېرې خوږې اوبه یې بهر ته بهیږی دا ښایی د اقتصادی ودې لپاره یو ښه زیری اوسی خو خلک د دغو بندونو د ډېرېدو تمه لری.
د رپوټونو پر بنسټ حکومت وایی چې اوس په ۱۳ بندونو د جوړېدو کار روان دی.

ممکن است شما دوست داشته باشید