روزنامه اصلاح

د بدخشان د سرو زرو یو کان کې څلور کان ‌کیندونکی مړه شوی

د بدخشان سیمه ‌ییز چارواکی وایی چې د دغه ولایت په راغستان ولسوالۍ کې د سرو زرو د کان د سپړلو پر مهال څلور کان‌ کیندونکی مړه شوی او درې نور ټپیان دی.
د بدخشان د پولیسو ویاند ثنا‌ءالله روحانی ته ویلی چې دا پېښه تېره ورځ د واورې او باران د ورښت له امله رامنځته شوې ده.
هغه وویل چې د ورښتونو له امله د کان یوه برخه غورځېدلې او کان ‌کیندونکو ته یې مرګ‌ژوبله اړولې ده.
روحانی زیاته کړه: “تیره ورځ له غرمې وروسته د بدخشان ولایت په راغستان سیمه کې د کانونو یوه کارخانه چې د سرو زرو د وینځلو وه، د زیاتې واورې او باران د ورښت له امله راغورځېدلې چې په ترڅ کې یې څلور کسه مړه شوی او درې نور ټپیان دی”.
د بدخشان د پولیسو ویاند وویل چې د راغستان ولسوالۍ امنیتی منسوبینو د پېښې ټپیان د سیمې روغتیایی مرکز ته بېولی او د مړو شویو کسانو جسدونه یې د هغوی کورنیو ته سپارلی دی. نوموړی د مړو شویو کسانو د هویت په اړه څه ونه ‌ویل.
د معلوماتو له مخې هرکال د بدخشان په راغستان ولسوالۍ کې د سرو زرو د موندلو لپاره د کیندونو پر مهال د کانونو د راغورځېدلو له امله کان کیندونکو ته مرګ ‌ژوبله اوړی.
د بدخشان د پولیسو ویاند وویل چې د افغان حکومت له خوا د غیر قانونی کان ‌کیندنې د مخنیوی له امله د راغستان په هغو سیمو کې د سروزرو د کان کیندنې کېږی چې د طالبانو تر ولکې لاندې دی.
د راغستان ولسوالۍ د بدخشان له ناامنو سیمو څخه ده چې خلک په کې د سرو زرو د استخراج لپاره خپلسرې کیندنې کوی.

ممکن است شما دوست داشته باشید