روزنامه اصلاح

د امنیتی بنسټونو د مالی مدیریت هر اړخیز پلان وارزول شو

د افغانستان د اسلامی جمهوریت جمهوررئیس او د وسله وال پوځ اعلی سرقوماندان محمد اشرف غنی پرون له غرمې مخکې د ملی دفاع او کورنیو چارو وزارتونو مرستیالانو سره په غونډه کې، په لګښتونو کې د سپما او د منابعو د ضایع کېدو د مخنیوی په موخه د امنیتی بنسټونو د مالی مدیریت هر اړخیز پلان وارزاوه.

په دغه غونده کې چې په ارګ کې وشوه، جمهوررئیس غنی په ۱۳۹۸ کال کې د ملی دفاع او کورنیو چارو وزارتونو په لګښتونو کې د سپما راپور د اورېدو ترڅنګ وویل، د امنیتی او دفاعی بنسټونولګښتونو په ځانګړی ډول د تېلو، اعاشې، غیر ضروری تجهیزاتو او قراردادونو په برخو کې پام وړ سمپا شوې. هغه ټینګار وکړ چې په امنیتی بنسټونو کې د بودجې لګښتونه باید د اغېز د زیاتوالی په اندازه وی او اړتیا ده چې سټنډرډ مالی سیستم جوړ شی.

جمهوررئیس څرګنده کړه، په امنیتی او دفاعی بنسټونو کې د بودجې او سپما پلان باید د اهدافو پر اساس ترتیب شی چې د بودجې په مصرف کې مؤثریت راشی. هغه همداراز ټینګار وکړ چې د فساد ضد جدی مبارزې او د منابعو د ضایع کېدو د مخنیوی په برخه کې دې لا زیات تمرکز وشی.

جمهوررئیس غنی په امنیتی او دفاعی بنسټونو کې تشکیلاتی تورم ته په اشارې د دغو بنسټونو مسوولینو ته لارښوونه وکړه چې د خپلو بنسټونو پر تشکیلاتو بیا کتنه وکړی او د تشکیلاتی تورم مخنیوی وکړی.

د هیواد جمهوررئیس وویل، د ولسوالیو په کچه دې د نظامی تاسیساتو، تجهیزاتو او وسایطو ارزونه او واضح تصویر رامنځته شی. د دې ارزونې پر اساس دې کمبودۍ او اړتیاوې روښانه او د هغو د پوره کېدو لپاره پر یوې طرحې هم کار وشی.

جمهوررئیس د تاسیساتو، تجهیزاتو او وسایطو ساتنه او څارنه مهمه وبلله او مسوولینو ته یې لارښوونه وکړه چې د امنیتی او دفاعی بنسټونو د تاسیساتو، تجهیزاتو او وسایطو د ساتنې او څارنې لپاره پلان او منظمه برنامه ترتیب کړی.

ممکن است شما دوست داشته باشید