روزنامه اصلاح

د افغانستان د بشری حقونو خپلواک کمېسیون  نوې رئیسه او غړی معرفی شول

د افغانستان د اسلامی جمهوریت جمهوررئیس محمداشرف غنی د جلا فرمانونو له لارې شهرزاد اکبر د افغانستان د بشری حقونو خپلواک کمېسیون د رئیسې او اسدالله یوسفی، بنفشه یعقوبی، محمدایوب یوسفزی، سیداحسان خلیق، شبنم صالحی، شکرالله مشکور، محمد نعیم نظری او راضیه صیاد د دې کمېسیون د نویو غړیو په توګه وټاکل.دغه راز جمهوررئیس غنی د جلا فرمانونو له لارې د افغانستان د بشری حقونو خپلواک کمېسیون مخکېنۍ رئیسه سیما سمر د بشری حقونو او بین المللی اړیکو چارو کې د جمهوررئیس د ځانګړې استازې او د دولت د وزیرې په توګه وټاکله او د هغې د خدمتونو او کوښښونو د تقدیر او ستاینې په خاطر یې مېرمن سیما سمر ته د مراسمو په لړ کې د علامه سیدجمال الدین افغان دولتی نښان هم ورکړ.په دغو مراسمو کې چې په ارګ کې جوړ شوی وو، د جمهوررئیس دویم مرستیال استاد سرور دانش او د هیواد لومړۍ مېرمن هم حضور درلود، یاد فرمانونه د جمهوررئیس ویاند صدیق صدیقی ولوستل.جمهوررئیس غنی د یاد نښان له ورکړې وروسته وویل، د ویاړ ځای دی هغه بنسټ چې په تېرو اتلسو کالو کې یې بېلابېل پړاوونه ووهل، نن یو نوی پړاو ته داخلېږی.جمهوررئیس د سیما سمرخدمتونو څخه په مننې وویل، ډاډه یم چې نوموړې به نوې دنده هم د هیواد د ملی ګټو مطابق په ښه ډول ترسره کړی.د هیواد جمهوررئیس د افغانستان د بشری حقونو خپلواک کمېسیون نوې رئیسې او غړیو ته د مبارکۍ ترڅنګ وویل، ملی ارزښتونه او د اساسی قانون مواد په ځانګړی ډول د هغه دویم څپرکی چې د اتباعو اساسی حقوق او وجایب دی او د بشری حقونو د نړیوالې اعلامیې مطابق ترتیب شوی، عام فهمه شی او وارداتی ونه ګڼل شی.د هیواد جمهوررئیس د خپلو خبرو په پای کې وویل، ملت، اساسی قانون، ملی او اسلامی ارزښتونو سره د عهد نوی کول زموږ ټولو له وجایبو څخه دی. په دې مراسمو کې سیما سمر وویل، زه ویاړم چې د لومړی ځل لپاره مې د افغانستان د بشری حقونو خپلواک کمېسیون ریاست په غاړه واخیست او نن دا کمېسیون د سیمې او نړۍ په کچه یوه نمونه ده.

سیما سمر، د افغانستان د بشری حقونو خپلواک کمېسیون له همکارانو، رسنیو او همکار هیوادونو مننه وکړه چې د بشری حقونو د تامین او د انسانی کرامت د خوندیتوب په خاطر یې زموږ ملاتړ وکړ.

هغې زیاته کړه، زموږ توقع داده چې دولت د کمېسیون لاسته راوړنې خوندی او پیاوړې کړی او د افغانستان د بشری حقونو خپلواک کمېسیون نوې رهبری په تازه انرژۍ کار وکړی او خلک له تبعیض او بې عدالتۍ څخه وساتی.د یادولو وړ ده چې جمهوررئیس، اجرائیه رئیس او د جمهوررئیس دویم مرستیال په شرایطو برابرو کسانو سره مرکې کړې وې او د دوی له منځه ۹ تنه د بشری حقونو خپلواک کمېسیون د نویو غړو په توګه وټاکل شول.

ممکن است شما دوست داشته باشید