حسینې ساپۍ په ټولنه کې د هنر او هنرمندانو رول ارزښتناک وباله

د اطلاعاتو او فرهنګ وزارت سرپرستې حسینې ساپۍ په ملی هنرستان کې د هنری اثارو نندارتون پرانیست.

د باختر آژانس خبریال د خبرله مخې، دغه  نندارتون د ملی هنرستان ریاست له لوری د هېواد د خپلواکۍ د سلمې کالیزې په  مناسبت جوړ شوى  دى چې په کې د انځورګرۍ، خطاطۍ، میناتورۍ، خیاطۍ، کارتون د ماشومان د هنر (لاسی کار) د کمپیوټر ډیزاین او اوبدلو هنری اثار شامل دی.

د نندارتون د پرانېستلو په مراسمو کې د اطلاعاتو او فرهنګ وزارت سرپرستې حسینې ساپۍ خبرې وکړې او لومړى یې د تېرې شنبې د پېښې د قربانیانو له  کورنیو سره  چې د کابل ښار د شپږمې ناحیې په مربوطاتو کې رامنځته شوې د خپلې ډاډګېرنې او غمشریکۍ مراتب څرګند کړل.

وروسته د اطلاعاتو او فرهنګ وزارت سرپرستې وویل، چې د اوسنیو ستونزو او ناخوالو په زغملوسره سره  بیا هم موږ نه نا هیلې کېږو خپلو خلکو او هېواد ته هیله من یو او زیار باسو څو په ناڅیزو امکاناتو سره  د هېواد د پرمختګ، پراختیا او آبادى په لور پرمخ ولاړ شو.

حسینې ساپۍ په ټولنه کې د هنر او هنرمندانو رول ارزښتناک وباله  او څرګنده یې کړه  چې هنرمندان او ځوانان د فکر، هنر او قلم خاوندان دی او په خپلو همدغو وسایلو سره مبارزه کوی  او په  هغې ژمنې  سره چې د خلکو او هېواد په وړاندې یې لری خپل احساس انځوری.

د ملی هنرستان رییس محمدهاشم شارق هم په خبرو کې د پروګرام په اړوند معلومات ورکړل او ویې ویل،  د دې ترڅنګ چې د ملی هنرستان ریاست دغلام محمد میمنه ګی د زده کړییز مرکز د امریت د زده کوونکو د نقاشۍ، خطاطۍ، میناتورۍ، کارتون، د ماشومانو هنر(لاسی کار) د کمپیوټرډیزاین او اوبدلو اثار نندارې ته وړاندې شوی  دی ، ٣٠ تنه ځوان انځورګران د غلام محمد میمنه ګی د هنری زده کړییز مرکز د زده کوونکو په ګډون د انځورګرۍ په سیالۍ لاس پورې  کوی او په عملی  او ژوندۍ بڼه د خپلواکۍ او آزادۍ  په اړوند خپل احساس انځوروی.

شارق وویل، چې د سیالۍ په پایله کې، د حکم هیئت له  څېړنې وروسته به درېیو غوره انځورګرانو ته نغدې جایزې ورکړاى شی.

 دغه راز د غلام محمد میمنه ګی د هنری زده کړییز مرکز یوې زده کوونکې مریم مهرزاد  د نورو په استازیتوب خبرې وکړې او د اطلاعاتو او فرهنګ وزارت  او د ملی هنرستان له  مشرتابه  څخه په دې خاطر چې د هغوى لپاره یې د هنرونو د زده کړې زمینه برابره کړې ده ، مننه وکړه.

د مراسمو په پاى کې  په داسې حال کې چې د اطلاعاتو او فرهنګ وزارت د فرهنګ او هنر معین پوهاند محمدرسول باوری، د دغه  وزارت سلاکاران، رییسان او یو شمېرمیلمانه هم حاضر وو، حسینې ساپۍ د هنری اثارو  نندارتون پرانېست او ګډون والوهغه وکوت.