روزنامه اصلاح

جمهوررئیس غنی دافغانستان برېښنا شرکت د فعالیتونو او لاسته راوړنو راپور واورېد

د افغانستان د اسلامی جمهوریت جمهوررئیس محمداشرف غنی برېښنا شرکت مسوولینو سره په غونډه کې د دغې ادارې د فعالیتونو او لاسته راوړنو راپور واورېد.
په دغه غونډه کې چې په ارګ کې جوړه شوه، په پیل کې د افغانستان برېښنا شرکت رئیس داوود نورزی او د یادې ادارې یو شمېر مسوولینو د تېر کال په پرتله د سږ کال په عوایدو کې د زیاتوالی، فساد سره د مبارزې، د برېښنا انرژۍ د عرضې او تقاضا، د انرژۍ په برخه کې د پانګونې، د ژمی فصل د پلان، تر کار لاندې پروژو، په چارو کې د شفافیت، په کابل ښار کې د یو شمېر اصلاحی برنامو د تطبیق، د استخدام او لاسته راوړنو په اړه جمهوررئیس ته معلومات ورکړل او دغه شرکت ته د لازیاتې پاملرنې غوښتونکی شول.
د هیواد جمهوررئیس د یادو ویناوالو د خبرو له اورېدو وروسته د برېښناشرکت د ضایعاتو د کمولو په اړه د جامع پلان هرکلی وکړ وې ویل، دا چې تاسې د برېښنا د ضایعاتو کمولو لپاره څومره پاملرنې، پانګونې او اصلاحاتو ته اړتیا لرئ، په اړه یې خپل وړاندیزونه راسره شریک کړئ.
جمهوررئیس غنی ټینګار وکړ، غواړم د دیجیټل جوړولو د بېلابېلو ابعادو په اړه یوې پایلې ته ورسېږو، په دې برخه کې مشخص وړاندیزونه وکړئ.
محمداشرف غنی څرګنده کړه، د افغانستان برېښنا شرکت او اترا اداره باید په ګډه په اساسی توګه د برېښنالېږد مزو او نوری فایبر په اړه یوې پایلې ته ورسېږی. هغه زیاته کړه، موږ باید دیجیټلی حکومتولی او دیجیټلی اقتصاد ولرو.
د هیواد جمهوررئیس د خپلو خبرو په پای د افغانستان برېښنا شرکت ته لارښوونه و کړه چې خصوصی سکتور سره دې په ګډه کار وکړی، ترڅو په ژمی کې د کابل ښاریانو او صنعتی پارکونو د برېښنا د کموالی ستونزه په درست ډول تنظیم او حل شی.

ممکن است شما دوست داشته باشید