روزنامه اصلاح

ارګ کې پر سوله او د ملی مصالحې عالی شورا جوړښت په اړه خبرې شوی

دافغانستان ولسمشر محمد اشرف غنی د ملی مصالحې عالی شورا د تشکیلاتو د جوړښت پرسر له ځنیو سیاسی مشرانو کتلی دی.
وروسته له هغه چې اروپایی ټولنې او امریکا د افغانستان د ملی مصالحې عالی شورا د تشکیلاتو د جوړېدو غوښتنه وکړه ولسمشر غنی تازه په دې اړه له ځنیو سیاسی مشرانو کتلی دی.
د جمهوری ریاست مرستیال ویاند دواخان مینه پال ازادی راډیو ته ویلی، چې په دغه کتنه کې د سولې پروسې په ګډون پر بېلابېلو مسایلو خبرې شوی دی.
هغه زیاتوی:” د افغانستان جمهور رئیس له مخکینی جمهوررئیس حامدکرزی، د ملی روغې جوړې عالی شورا رئیس ډاکټر صیب عبدالله عبدالله او د هېواد جهادی رهبر فضیلتماب استاد عبدرب الرسول سیاف سره وکتل، په دغه کتنه کې د سولې پروسې او د ملی روغې جوړې عالی شورا پر جوړښت، د هغه پر څرنګوالی او لومړنی غونډې د جوړېدو په اړه ډېر مثبت بحثونه وشول.”
دا په داسې حال کې ده چې د افغانستان د ملی مصالحې د عالی شورا د جوړښت څخه څه باندې شپږ میاشتې کېږی خو لا هم دغې شورا په رسمی ډول کار نه دی پیل کړی او نه یې هم د غړو تشکیل معلوم دی.
تردې وړاندې اروپایې ټولنې د دغې شورا د تشکیلاتو د جوړېدو غوښتنه کړې وه او کابل کې امریکا سفارت هم د اروپایې ټولنې د غوښتنې ننګه کړې وه.
په افغانستان کې د اروپایی ټولنې غړو دوه ورځې وړاندې د یوې اعلامیې په خپرولو سره د افغانستان له حکومت څخه غوښتی وو چې د ملی مصالحې عالی شورا غړی دې معلوم کړی څو عملی کارونه پیل کړی او د سولې په روان بهیر کې ونډه واخلی.
په ورته وخت کې په کابل کې د امریکا او بریتانیا سفارتونو هم د اروپایی تولنې د یادې اعلامیې هرکلی کړی و او زیاته کړې وه چې افغان حکومت دې د ملی مصالحې د عالی شورا په جوړښت کې کوټلی ګامونه پورته کړی.
له بلې خوا د بین‌الافغانی مذاکرو د کړنلارې پر نهایی کېدو، په قطر کې د افغان دولت او طالبانو د مذاکره کوونکو له ‌خوا ضد و نقیض څرګندونې شوې دی.
که څه هم په قطر کې د طالبانو سیاسی دفتر وایی، د افغانانو د خپلمنځی مذاکرو پر ټوله کړنلار موافقه شوې ده، خو افغان دولت وایی، اختلافی ټکی لا هم حل شوی نه‌دی.
د دولت مذاکره کوونکی وایی د مذاکرو د کړنلارې پر ۲۱ مادو «په اصولو کې» موافقه شوې، خو د مقدمې متن نور وضاحت ته اړتیا لری.
خو په قطر کې د طالبانو د سیاسی دفتر ویاند ډاکټر محمد نعیم وایی، اصلی مذاکرو کې پر کړنلارو د دواړه مذاکره کوونکو ډلو له ‌خوا موافقه شوې ده.
د دولت او طالبانو مذاکره کوونکی د سپټمبر له ۱۲مې په قطر کې په مذاکرو بوخت دی چې د افغانانو اصلی خپلمنځی مذاکرو ته زمینه برابره کړی.
خو د ځینو اختلافی ټکو د اصلی مذاکرو د کړنلارې او اجنډا مخه ډب کړې وه چې یوه موضوع د امریکا او طالبانو پر موافقې او حنفی فقهې د طالبانو ټینګار بلل شوی دی.

ممکن است شما دوست داشته باشید